«МӘДЕНИЕТ ЖӘНЕ ИННОВАЦИЯ» республикалық форумы жалғасуда
20 мая 2026
«МӘДЕНИЕТ ЖӘНЕ ИННОВАЦИЯ» республикалық форумының екінші күні ҚР Ұлттық академиялық кітапханасында жалғасты. Күн тәртібінде кітапхана ісін құқықтық реттеу, цифрлық трансформация, инновациялық даму және заманауи басқару модельдері кеңінен талқыланды.
Форум жұмысы кітапхана директоры Күміс Сеитованың «Кітапхана және кітап баспа ісін құқықтық реттеудің өзекті мәселелері» тақырыбындағы дәрісімен басталды. Баяндамашы саладағы заңнамалық өзгерістерге, кітапхана және баспа ісін жетілдіру бағыттарына тоқталып, әзірленіп жатқан заң жобасы аясындағы негізгі басымдықтарды атап өтті. Қатысушылар тарапынан ұсыныстар айтылып, болашақ жоспарлар нақтыланды.
Одан кейін кітапхана директорының орынбасары Нұржан Жолдыбалинов «Metabiblioteka: болашақ кітапхананың цифрлық экожүйесі» тақырыбында баяндама жасап, кітапхана қызметін интеграцияланған цифрлық платформа арқылы дамыту, бірыңғай ақпараттық кеңістік қалыптастыру мәселелерін көтерді.
Педагогика ғылымдарының кандидаты, әл-Фараби атындағы ҚазҰУ доценті, Халықаралық ақпараттандыру академиясының академигі Кәлима Туенбаева «Кітапхана 4.0: мәдениет, бизнес және жасанды интеллект дәуіріндегі жаңа модель» тақырыбында сөз сөйлеп, кітапханалардың жаңа әлеуметтік-мәдени кеңістік ретіндегі рөліне тоқталды.
Сондай-ақ, George Washington University жанындағы Central Asia Program түлегі Данияр Қосназаров «Кітапхана қызметін монетизациялау әдістері: үздік тәжірибелер мен құралдар» тақырыбында халықаралық тәжірибелерді таныстырып, кітапхана қызметін қаржылық тұрғыдан әртараптандыру жолдарын ұсынды.
Форум жұмысына 130-дан астам кітапханашылар қатысты. Бағдарлама аясында фасилитациялық форматта пікір алмасу ұйымдастырылып, жобалар әзірлеу бойынша практикалық сессия өтті. Іс-шара соңында қатысушыларға сертификаттар табысталды.
