Халық ақыны Сәттіғұл Жанғабылұлының 150 жылдығына арналған әдеби-сазды кеш

Халық ақыны Сәттіғұл Жанғабылұлының «Алтынын жырдың ақтардым...» әдеби-сазды кеші өтті

(Сәттіғұл ақынның 150 жылдығына орай)

Қазақстан Республикасы Ұлттық академиялық кітапханасында ҚР Мәдениет және ақпарат министрлігінің қолдауымен қазақтың халық ақыны Сәттіғұл Жанғабылұлының 150 жылдығына арналған «Алтынын жырдың ақтардым…» атты әдеби-сазды кеш өтті.

Іс-шараның басты мақсаты – жыр алыбының шығармаларын кеңінен насихаттау, оның адамгершілік, имандылық, ерлік пен елдік рухтағы өлең-толғауларын жас ұрпақтың санасына сіңіру. Кеш барысында ақын мұрасы жан-жақты талданып, жырлары сахнада орындалды..

Сәттіғұл Жанғабылұлы – Маңғыстау өңірінде дүниеге келген, қазақтың суырыпсалма ақындық дәстүрін жалғаған, үш дәуірдің куәсі болған тұлға. Ол он бес жасынан бастап жыр шығарумен айналысып, ел арасында ауыз әдебиеті үлгілерін таратып, ізгілік пен білімге үндеген. Ақын өз шығармаларында халықтың өткені мен болашағын, заман тынысын терең толғап, рухани құндылықтарды дәріптеді.

Кешті ҚР Журналистер одағының мүшесі, «Сөз бен саз» бағдарламасының авторы Бердіхан Әлмен жүргізді. Шара аясында Маңғыстау облыстық Қабиболла Сыдиықұлы атындағы кітапхана ұйымдастырған ақынның 150 жылдығына арналған кітап көрмесі көпшілік назарына ұсынылды.

Кешке Қазақстанның Еңбек сіңірген қайраткері, ақын Оңайгүл Тұржанова, жыршы, Күләш Бәйсейітова атындағы Қазақ ұлттық өнер университетінің ұстазы Амандық Көмекұлы, ақын Маржан Ершу, сондай-ақ зиялы қауым өкілдері, өнер сүйер қауым, БАҚ өкілдері, университет студенттері мен кітапхана оқырмандары қатысты.

Тағылымды кеш барысында халық ақыны Сәттіғұл Жанғабылұлының бай рухани мұрасын ұлықталып, ұлттық әдебиет пен дәстүр сабақтастығы дәріптелді.