ҚР Ұлттық академиялық кітапханасында Мемлекет және қоғам қайраткері Қ.Сұлтановтың «Қазақтың Қонаевы» және «Отыз жылдың ой толғауы» атты кітаптарының таныстырылымы өтті.
05 апреля 2025
ҚР Ұлттық академиялық кітапханасында Мемлекет және қоғам қайраткері Қ.Сұлтановтың «Қазақтың Қонаевы» және «Отыз жылдың ой толғауы» атты кітаптарының таныстырылымы өтті.
«Қазақтың Қонаевы» кітабы ұлтымыздың ұлы перзенті Дінмұхамед Ахметұлы Қонаевтың ұзақ жылдар ұлт мүддесінде атқарған мемлекеттік қайраткерлік еңбегіне арналады. Қуаныш Сұлтановтың естеліктерінде өзі куә болған кейбір оқиға, сәттер баяндалады. Одақтық үстемдік жағдайындағы әділетсіздіктер мен қайшылықтар сарапталып, жеңіл, қарапайым тілмен оқушы назарына ұсынылады.
Қуаныш Сұлтанов пен журналист Гүлсім Еңсепованың «Отыз жылдың ой-толғауы» атты сұхбаттарына басты құндылық – Тәуелсіздік жайы, оны қастерлеу, ұлттық қауіпсіздігімізді күшейту, еліміздің дүниежүзілік қоғамдастықтағы, халықаралық беделінің өсуі, ел тұрмысының сапасын көтеру, т.б. маңызды мәселелерді арқау еткен. Сұхбат нақты деректерге сүйене отырып, жеңіл әңгіме түрінде баяндалады.
Шараны Мемлекет және қоғам қайраткері – Дархан Мыңбай жүргізді.
Әдеби шарада сөз алған Мемлекет және қоғам қайраткері Мырзатай Жолдасбеков Қуаныш Сұлтанұлының ел өркендеуі мен игілігі жолында атқарған келелі істеріне тоқталып, жиналғандарға ақ батасын берді.
ҚР Президентінің кеңесшісі Бауыржан Омаров: «Қазір Мемлекет қайраткерінің қалам ұстауы таңсық емес. Тек олардың ұсынған дүниелерінде сол кездің өзекті мәселелері қалай көрініс тапты екен деп зер салатынымыз анық. Қуаныш Сұлтанұлы Мемлекеттік қызметке қалам ұстай келіп, өмір бойы қолынан тастамаған адам. Тәуелсіз еліміздің тұңғыш Ақпарат министрінің қадамына да, қаламына да күмән болмауы тиіс» - деп, қос жинақтың ерекшеліктеріне тоқталды.
Мемлекет және қоғам қайраткерлері – Әділ Ахметов, Қырымбек Көшербаев сынды ұлт зиялылары да өнегелі өмір иесі Қуаныш Сұлтанұлын жаңа жинақтарымен құттықтап, сәттілік тіледі.
Рухани шараға зиялы қауым өкілдері, Мемлекет және қоғам қайраткерлері, ақын-жазушылар, журналистер, оқырмандар қатысты.
