Кореяда кітапханааралық ынтымақтастықты нығайтуға бағытталған кездесу өтті
15 Qyrkúıek 2026
Қазақстан Республикасының Президенті Қасым-Жомарт Тоқаевтың Корея Республикасына мемлекеттік сапары аясында Қазақстан мен Корея арасындағы мәдени-гуманитарлық байланыстарды нығайтуға бағытталған маңызды кездесулер өтуде.
Осы орайда Корея Республикасында Қазақстан Республикасы Ұлттық академиялық кітапханасы мен Корея Ұлттық кітапханасы арасында кәсіби кездесу өтті.
Кездесуге Қазақстан Республикасы Ұлттық академиялық кітапханасының директоры Күміс Қарсақбайқызы Сейітова және Корея Ұлттық кітапханасының басшысы Нам Ён Джун (Nam Young-joon) қатысып, екі елдің ұлттық кітапханалары арасындағы ынтымақтастықты дамыту мәселелерін талқылады.
Кездесу барысында мәдени және ғылыми мұраны сақтау, цифрлық трансформация, жасанды интеллектіні кітапхана қызметіне енгізу, оқырмандарға жаңа сервистер ұсыну және кәсіби тәжірибе алмасу бағыттарына ерекше назар аударылды.
Сонымен қатар, Қазақстан Республикасы Ұлттық академиялық кітапханасы мен Корея Ұлттық кітапханасы арасында өзара ынтымақтастық туралы Меморандумға қол қойылды.
