Жазушы-этнограф Төрехан Майбастың «Қазақ халқының көмескіленген этнографиясы» кітабының тұсаукесері өтті
22 Sáýіr 2026
Жазушы-этнограф Төрехан Майбастың «Қазақ халқының көмескіленген этнографиясы» кітабының тұсаукесері өтті
«Ұлттық кітап күні» апталығы аясында Қазақстан Республикасының Ұлттық академиялық кітапханасында жазушы-этнограф, өлке тарихын зерттеуші Төрехан Майбастың «Қазақ халқының көмескіленген этнографиясы» атты кітабының тұсаукесері өтті.
Іс-шара барысында автордың жаңа еңбегінің мазмұны мен маңызы кеңінен таныстырылды. Кітапта қазақ халқының рухани болмысы, ұлттық этнографиядағы күрделі әрі өзекті мәселелер терең талданып, көмескіленген тарихи-танымдық қырлар жан-жақты сараланады. Автор әрбір сауалдың түп-төркінін таразылап, оқырманды ойлануға жетелейтін мазмұнды тұжырымдар ұсынады. Көркем де шұрайлы тілмен жазылған еңбек көпшілік оқырман қауымға арналған.
Шараны «Қазақ газеттері» ЖШС Бас директорының орынбасары Қамбар Ахметов жүргізді.
Қазақстан Республикасы Парламенті Мәжілісінің депутаты Асхат Аймағамбетов Мәжіліс төрағасы Ерлан Қошановтың құттықтауын жеткізді. Сонымен қатар Қазақстан Республикасы Президентінің кеңесшісі Бауыржан Омаров, ҚР ҰҒА академигі, филология ғылымдарының докторы, профессор, «Қазақ газеттері» ұжымының Бас директоры Дихан Қамзабекұлы, ақын, Қазақстанның еңбек сіңірген қайраткері Серік Ақсұңқарұлы қаламгер еңбегінің ғылыми-танымдық және рухани маңызына тоқталып, ізгі тілектерін білдірді.
Тұсаукесерге мемлекет және қоғам қайраткерлері, зиялы қауым өкілдері, бұқаралық ақпарат құралдарының өкілдері мен оқырмандар қатысты.
