Ақын С. Оспанұлының шығармашылығына арналған кездесу

Ақын С. Оспанұлының шығармашылығына арналған «Сарқылмас кеудем менің – ойдың кені» атты шығармашылық кездесу

Қазақстан Республикасы Ұлттық академиялық кітапханасында ақын, халықаралық «Алаш» әдеби сыйлығының лауреаты, ыбырайтанушы-ғалым, филология ғылымдарының кандидаты, профессор Серікбай Оспанұлымен «Сарқылмас кеудем менің – ойдың кені» атты шығармашылық кездесу өтті.

Кеш барысында қаламгердің «Ыбырай жолы», «Ахметтану», «Ақынның жаны», «Мейірім бастауы – бесік жыры», «Серікбай: лебіз, ілтипат» атты кітаптарының таныстырылымы ұйымдастырылды. Автордың ғылыми еңбектері мен көркем туындыларының рухани құндылығы, ұлттық әдебиет пен ағартушылық бағыттағы ізденістері кеңінен сөз болды.

Серікбай Оспанұлы оқырман қауымға «Жер жүрегі», «Жарқын жастық», «Қайнарбұлақ», «Қоңыраугүл», «Алтын арқау» сынды жыр жинақтарымен жақсы таныс. Оның «Шилі өзен», «Сағындым Алматымды», «Айлы түнде» атты әндері ел арасына кеңінен тараған. Ақынның 200-ден астам өлеңіне ән жазылған. Балаларға арналған бірқатар өлеңдері 2–4 сыныптарға арналған «Ана тілі», «Қазақ тілі» оқулықтарына енгізілген.

Серікбай Оспанұлы көпшілікке тек ақын әрі публицист ретінде ғана емес, халық қолөнерінің шебері, ұлттық мұраның жанашыры ретінде де белгілі. Ол ағаштан ыдыс-аяқтар мен ұлттық музыкалық аспаптар, соның ішінде домбыра жасап, дәстүрлі өнерді насихаттап келеді.

Кездесуді ұйымдастырған ақынның шәкірттері ұстазына алғыстарын білдіріп, шығармашылық жолындағы өнегесін ерекше атап өтті. Кештің құрметті қонақтары қатарында «Қазақ газеттері» ЖШС-нің бас директоры, академик Диқан Қамзабекұлы, жазушы, Қазақстанның еңбек сіңірген қайраткері Қойшығара Салғарин, филология ғылымдарының докторы, профессор Серік Негимов, ақын, Қазақстанның еңбек сіңірген қайраткері Серік Тұрғынбек және өзге де зиялы қауым өкілдері болды. Олар кеш иесінің шығармашылық әлеуетіне жоғары баға беріп, ұлттық әдебиетке қосқан үлесін айрықша атап өтті.

Шараға ақын-жазушылар, ғалымдар, журналистер, шәкірттері мен оқырмандар қатысты.